काठमाडौँ। राष्ट्रिय स्वतन्त्र पार्टी (रास्वपा)ले इलाम २ मा हुने उपनिर्वाचनमा मिलन लिम्बूलाई उम्मेदवार बनाएको छ।
प्राइमरी इलेक्सनका लागि ६ जनाको उम्मेदवारी परेकोमा ५ जनाले लिम्बूलाई समर्थन गरेपछि सर्वसम्मत उम्मेदवारी चयन गरिएको रास्वपा सह-महामन्त्री कविन्द्र बुर्लाकोटीले बताए।
प्राइमरी इलेक्सनका लागि गोकुलबहादुर राई, जमुना शर्मा, महेन्द्रकुमार थापा, मानबहादुर घिमिरे, र डा.शेषरमण न्यौपानेको उम्मेदवारी परेको थियो । आज पार्टी कार्यालय वनस्थलीमा सहमहामन्त्री बुर्लाकोटीले राखेको छलफलमा उनीहरुले लिम्बुलाई समर्थन गरेका थिए।
रास्वपामा प्राइमरी इलेक्सनका माध्यमबाट उम्मेदवार छनोट हुने प्रावधान भएपनि इलाम-२ मा विधि अनुसार पार्टी सदस्य नपुगेपछि सहमति खोजिएको बुर्लाकोटीले बताए।
प्राइमरी इलेक्सनका लागि मतदाता सङ्ख्याको १ प्रतिशत पार्टी सदस्य हुनुपर्ने विधिमा उल्लेख छ। १ लाख १८ हजार मतदातामा ११ सय ८० पार्टी सदस्य हुनुपर्छ। इलाम-२ मा रास्वपासँग ११ सय ८० पार्टी सदस्य नरहेको बुर्लाकोटीले बताए। हालैमात्र माओवादी परित्याग गरेका लिम्बूले रास्वपाको प्राइमरी चुनावमा दरखास्त हाल्नुअघि पार्टीको सदस्यता लिएका थिए।
