काठमाडौँ। कर्णाली यश्विजले एभरेस्ट महिला भलिबल लिग (इडब्ल्युभिएल) मा लगातार दोस्रो जित हासिल गरेको छ।
त्रिपुरेश्वरस्थित राष्ट्रिय खेलकुद परिष्द् (राखेप) कभर्डहलमा मंगलबार सम्पन्न खेलमा कर्णालीले गण्डकी थन्डर्सविरुद्ध ३-२ सेटको जित निकाल्यो। पहिलो सेटमा गण्डकीले २५-१५ को सहज जित निकालेको थियो। त्यसपछिका दुई सेट २५-२२, २५-१७ ले आफ्नो पक्षमा पार्दै कर्णालीले २-१ को अग्रता लियो।
चौथो सेटमा गण्डकी २५-१९ ले विजयी भएपछि खेल लम्बियो। पाँचौं तथा निर्णायक सेटमा १५-१२ को जित निकाल्दै कर्णालीले विजयी यात्रा कायम राख्यो। जितसँगै कर्णालीले दुई खेलमा पाँच अंक जोडेको छ। दुवै खेलमा पराजित गण्डकीको एक अंक छ।
पहिलो खेलमा कर्णालीले मधेश युनाइटेडलाई ३-१ को सेटमा पराजित गर्दा गण्डकीले चितवन शक्तिविरुद्ध ३-१ सेटमा हार बेहारेको थियो। कर्णालीले आफ्नो तेस्रो खेलमा बुधवार ललितपुर क्विन्ससँग खेल्नेछ। उता, गण्डकीले भने बुधवार नै काठमाडौं स्पाइकर्ससँग तेस्रो खेल खेल्नेछ।
आजको दोस्रो खेलमा काठमाडौं स्पाइकर्स र चितवन शक्ति तथा तेस्रो खेलमा ललितपुर क्विन्स र मधेश युनाइटेडबीच खेल हुदैछ।
