काठमाडौँ। आईसीसी एकदिवसीय विश्वकप छनोट क्रिकेटको प्लेअफ चरणको आइतबार भएको खेलमा संयुक्त अबर इमिरेट्स (यूएई) ले नेपाललाई एक सय ८२ रनको लक्ष्य दिएको छ ।
टस हारी पहिलो ब्याटिङको निम्तो पाएको यूएईले ४६.५ ओभरमा अलआउट हुनुअघि एक सय ८१ रनमात्र बनाउन सक्यो ।
यूएईलाई ठूलो योगफल तयार पार्नबाट रोक्न नेपाली स्पिनर सन्दीप लामिछानेले तीन विकेट लिए । करण केसीले पनि तीन विकेट हात पारे । प्रतिस जीसी, गुल्सन झा र दीपेन्द्रसिंह ऐरीले पनि एक—एक विकेट लिए ।
सन्दीपले १० ओभर बलिङ गर्दै तीन मेडनसहित केवल २३ रन खर्चिएका थिए । करणले ८.५ ओभरमा ३६ रन खर्चिए । प्रतिसले १० ओभरमा ३९, गुल्सनले ६ ओभरमा ३२ र दीपेन्द्रले पाँच ओभरमा एक मेडनसहित १४ रन खर्चिएका थिए ।
नेपालका ओपनर बलर करण केसीले यूएईका ओपनर ब्याट्सम्यान आसिफ खानलाई शून्य रनमै पेभेलियन फर्काएका थिए । करणले पहिलो ओभरको दोस्रो बलमै आसिफलाई विकेटकिपर अर्जुन साउदमार्फत क्याच गराएका थिए । पहिलो विकेट गुमाउँदै यूएईले खातासम्म खोलेको थिएन ।
सन्दीपले यूएईको दोस्रो विकेट लिएका थिए । सन्दीपले यूएईका विकेटकिपर ब्याट्सम्यान आर्यान्स शर्मालाई २८ रनमा पेभेलियन फर्काएका हुन् । सन्दीपले उनलाई २८ रनको ब्यक्तिगत स्कोरमा आरिफ शेखमार्फत क्याच गराए । आर्यान्स आउट हुँदा यूएईले ६४ रन बनाएको थियो ।
स्पिरन सन्दीपले नै यूएईको तेस्रो विकेट लिएका थिए । उनले यूएईका चौथो नम्बरका ब्याट्सम्यान रमिज सहजादलाई १० रनको ब्यक्तिगत स्कोरमा एलबीडब्लूको धरापमा पारेका थिए । रमिज आउट हुँदा यूएईले ८५ रन बनाएको थियो ।
यूएईको चौथो विकेट गुल्सन झाले लिएका थिए । उनले यूएईका कप्तान वृत्य अरविन्दको विकेट लिएका हुन् । गुल्सनले अरविन्दलाई ४४ रनमा बोल्ड गरेका थिए । ७५ बलमा चार चौका प्रहार गरेका अरविन्द आउट हुँदा यूएईले ९७ रन बनाएको थियो ।
करणले यूएईको पाँचौं विकेटका रुपमा रोहन मुस्तफालाई आउट गराएका थिए । ३५ रन बनाएका रोहनलाई करणले अर्जुन साउदमार्फत क्याच गराएका हुन् । रोहनले ५६ बलको सामना गरी तीन चौका हिर्काएका थिए । रोहन आउट हुँदा यूएईले एक सय ५५ रन बनाएको थियो ।
यूएईको छैटौं विकेटका रुपमा बासिल हमिद पेभेलियन फर्किएका थिए । उनको विकेट दीपेन्द्रसिंह ऐरीले लिएका हुन् । दीपेन्द्रले बासिललाई २९ रनको ब्यक्तिगत स्कोरमा करण केसीद्वारा क्याच गराएका थिए । बासिल आउट हुँदा यूएईले एक सय ५९ रन बनाएको थियो ।
यूएईका अली नासिर सातौं विकेटका रुपमा पेभेलियन फर्किएका थिए । चार रन बनाएका नासिर रनआउट भएका थिए । उनलाई कप्तान रोहित पौडेलले रनआउट गरेका हुन् । सातौं विकेट गुमाउँदासम्म यूएईले एक सय ६२ रन बनाएको छ ।
यूएईको आठौं विकेटका रुपमा सन्चित शर्मा आउट भएका थिए । उनको विकेट स्पिनर सन्दीपले लिएका थिए । सन्दीपले सन्चितलाई १२ रनको ब्यक्तिगत स्कोरमा अर्जुन साउदमार्फत क्याच गराए । सन्चित आउट हुँदा यूएईले एक सय ७७ रन बनाएको थियो ।
नवौं विकेटका रुपमा यूएईका जुनैद सिद्धकी पेभेलियन फर्किएका थिए । खातासम्म खोल्न नसकेका जुनैदलाई नेपाली बलर प्रतिस जीसीले बोल्ड गरेका थिए । जुनैद आउट हुँदा यूएईले एक सय ७८ रन बनाएको थियो ।
अन्तिम विकेटका रुपमा यूएईका मुहम्मद जवादुल्लाह पेभेलियन फर्किएका थिए । उनी एक रनको ब्यक्तिगत स्कोरमा करण केसीको बलमा बोल्ड भएका थिए । यूएईले नेपाली बलरबाट अतिरिक्त रुपमा १३ रन पाएको थियो ।
नेपालले टस जितेर पहिले बलिङ गर्ने निणर्य लिएको थियो । यसअघि नै उपाधि होडबाट बाहिरिइसकेको नेपालले वरीयताका लागि यूएईसँग भिडन्त गरेको हो । यो खेलमा विजयी हुने टोलीले आगामी मंगलबार आयरल्यान्डसँग सातौं वरीयताका लागि प्रतिस्पर्धा गर्नेछ । आयरल्यान्डविरुद्धको खेलमा विजयी हुने टोलीले सातौं र पराजित हुने टोलीले आठौं वरीयता प्राप्त गर्नेछ ।
यसैगरी नेपाल र यूएईबीचको खेलमा पराजित हुने टोलीले आगामी बिहीबार अमेरिकासँग नवौं वरीयताका लागि प्रतिस्पर्धा गर्नेछ । अमेरिकाविरुद्दको खेलमा विजयी हुने टोलीले नवौं र पराजित हुने टोलीले १० औं वरीयता प्राप्त गर्नेछन् । विश्वकप छनोट प्रतियोगिता जिम्बाबेमा भइरहेको छ ।
नेपाल र यूएईबीच खेलिएका पछिल्ला पाँचमध्ये चार खेलमा नेपाल विजयी भएको छ । एउटा खेलमा भने यूएई विजयी भएको छ । पछिल्लो पटक गत मेमा घरेलु मैदानमा खेलिएको एसीसी प्रिमियर कपको फाइनलमा नेपालले यूएईलाई सात विकेटले हराएको थियो ।
त्यसअघि गत मार्च १६ तारिखमा कीर्तिपुर अन्तर्राष्ट्रिय क्रिकेट मैदानमा खेलिएको आईसीसी क्रिकेट वल्र्ड कप लिग टुको खेलमा नेपालले यूएईलाई डकवर्थ एन्ड लुइस नियमका आधारमा नौ रनले पराजित गरेको थियो ।
यसैगरी लिग टु प्रतियोगिताकै मार्च १२ तारिखमा खेलिएको खेलमा घरेलु टोली नेपालले यूएईलाई एक सय ७७ रनको फराकिलो अन्तरले पाखा लगाएको थियो । त्यसअघि लिग टु प्रतियोगिताको मार्च ६ तारिखमा दुबईमा खेलिएको खेलमा नेपालले यूएईलाई ४२ रनले हराएको थियो । सोही प्रतियोगिताको मार्च २ तारिखमा दुबईमै खेलिएको खेलमा भने यूएईले नेपाललाई ६८ रनले हराएको थियो ।
