काठमाडौँ। काठमाडौंको प्रदर्शनीमार्गस्थित रत्नराज्यलक्ष्मी क्याम्पस (आरआर) मा एमाले निकट अनेरास्ववियु क्याम्पस कमिटीका विद्यार्थी नेताहरूले एकआपसमा कुटाकुट गरेका छन्।
कमिटीको विस्तारित बैठकका क्रममा बिहीबार बिहान कुटाकुट भएको हो।
कमिटी पुनर्गठन र नेतृत्व चयन गर्ने विषयलाई लिएर सोही क्याम्पसका विद्यार्थी र केन्द्रीय कमिटीका पदाधिकारीहरूबीच भनाभन पश्चात झडप भएको थियो।
झडपमा परेर केही विद्यार्थी नेताहरू सामान्य घाइते छन्। झडपको भिडियो अहिले सामाजिक सञ्जालमा चर्चाको विषय बनेको छ। झडपपछि विस्तारित बैठक स्थगित भएको छ।
भाइरल भिडियोमा संगठनका उपमहासचिव तथा सोहि क्याम्पसका स्ववियु सभापति तपेन्द्रजंग शाहीमाथि हमला भएको देखिन्छ। साथै उनी पनि तनावग्रस्त अवस्थामा देखिन्छन्।
