काभ्रे। नेकपा माओवादी केन्द्रका अध्यक्ष पुष्पकमल दाहाल प्रचण्डले जाली झेली फटाहाविरुद्ध आक्रामक बन्न र जनताको पक्षमा काम गर्न नेता कार्यकर्ताहरूलाई निर्देशन दिएका छन्।
वाइसीएल काभ्रेको पाँचखाल नगर सम्मेलनलाई सम्बोधन गर्दै प्रचण्डले वाइसीएललाई जाग्न र २०६४ सालको अवस्थामा सक्रिय हुन निर्देशन दिएका हुन्।
उनले माओवादीलाई तर्साउन खोजिरहेको भन्दै कायर र दलालहरूलाई वाइसीएल जागेर ठिक पार्नुपर्ने अवस्था आएको बताए। उनले भने, ‘जाइलाग्ने होइन, आइलागे पनि इँटको जवाफ पत्थरले दिने।’
‘अबको चुनाव २०६४ को जस्तो बनाउनै पर्छ। जालझेल गर्ने र बाकस साट्नेहरूलाई भ्याकुर लखेटेझैँ लखेट्नुपर्छ। सोझो हुँदै जाँदा हेपियो। गुण्डा र भ्रष्टहरुलाई ठोक्ने। करोडौँ भ्रष्टाचार गरेर दिउँसै रात पार्नेहरूलाई ठिक पार्नुपर्छ र जनताको सेवा गर्नुपर्छ’, प्रचण्डको भनाइ छ।
अब म समाजवादी क्रान्तिका लागि हामफालेँ
नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले अब आफु समाजवादी क्रान्तिका लागि ज्यान छोडेर हामफालेको बताएका छन् । वाइसीएल काभ्रेको पाँचखाल नगर सम्मेलनलाई बिहीबार सम्बोधन गर्दै प्रचण्डले हिजो पनि आफू पटक–पटक हामफालेको भन्दै अब एकचोटी सच्चिएर समाजवादी क्रान्तिका लागि हाम फाल्ने बताएका हुन्।
‘मत एकचोटी फेरि हाम्फाल्छु,हिजो जनयुद्धमा हामफालेँ, अर्कोपटक शान्ति प्रक्रियामा हामफालेँ, त्यसपछि संविधान बनाउन र पार्टी एकतामा हामफालियो । अब फेरि समाजवादी क्रान्तिको निम्ति म चाहीँ हामफालेँ फालेँ अब’ पूर्व प्रधानमन्त्रीसमेत रहेका प्रचण्डको भनाइ छ।
उनले पहिला आफैलाई करेक्सन गर्दै जाने पनि बताए। ‘सबैले अरुले विगार्यो, यो फटाहा हो भन्नुभन्दा मैले के बिगारेँ भनेर सोच्न थालियो भने त्यहीबाट रुपान्तरण सुरु हुन्छ’ प्रचण्डले माओवादी नेता कार्यकर्तालाई सच्चिन आग्रह गर्दै भने, ‘भ्रष्टाचार गरिएको छ, ठगठाग खुब गरिएको छ। ठेक्कापट्टा पाउन मरिहत्ते, कमिसन खान मरिहत्ते गर्ने अनि म बिग्रेको छैन भन्ने प्रवृत्ति बढेको छ।’ प्रचण्डले यसो भनेपनि माओवादी पार्टी क्रान्तिकारी नहुने पनि बताए।
‘म अब बन्छु भनेर सुरु गरियो भने सबै बन्छन्। त्यसपछि क्रान्तिकारी पार्टी बन्छ। त्यसो भएर म चाही हामफालेँ अब। कति वर्ष बाँचिन्छ। पुरै ज्यान छोडेर समाजवादी क्रान्तिका निम्ति युवाहरुको नेतृत्व गर्छु म’, प्रचण्डको दावी छ।
