काठमाडौँ। नेकपा एमाले संसदीय दलका उपनेता सुवास नेम्वाङले मन्त्रिपरिषद् विस्तार गर्दा सरकार ढल्ने दाबी गरेका छन्।
साथै उनले सरकार ढल्ने र दल फुट्ने सक्ने संभावना देखिएको दाबी गरेका छन्। राष्ट्रिय युवा संघ नेपालले सोमबार गरेको कार्यक्रममा नेम्वाङले सरकार बनेको ५० दिनसम्म मन्त्रिपरिषद् विस्तार नहुनुमा सरकार ढल्ने डर मुख्य कारण भएको बताए।
‘पाँच जना मन्त्रीले चलेको यो सरकार ५० दिन पुग्दा पनि विस्तारको नाम निशाना छैन। सरकार विस्तार गर्दा यो सरकार नै पो ढल्छ भन्ने डर छ’, नेम्वाङले भने।
उनले अगाडि भने, ‘सरकार विस्तार भयो भने दल फुट्ने हो कि सरकार नै ढल्ने हो कि भन्ने अचम्मको अवस्था छ। यो अवस्थामा सरकार चलिरहेको छ। ’
दोस्रो पटक संसद् विघटन गर्नु केपी ओलीको बाध्यता भए पनि सर्वोच्च अदालतले अचम्मको फैसला गरेको नेम्वाङले टिप्पणी गरे। सरकारले विजनेस नदिंदा संसद्ले सिन्को भाँच्न पनि नपाएको उनले बताए।
उनले पार्टी अध्यक्ष केपी ओलीको जनताको बीचमा गएर नयाँ जनादेश ल्याउने यात्रामा सहभागि हुन आग्रह गरे। उनले भने, ‘केपी ओली कमरेडले भने जस्तै जनताको बीचमा गएर नयाँ जनादेश ल्याउने नै हो। त्यसका लागि युवाहरु जोडले लाग्नुपर्छ।’
