काठमाडौँ। सुदूरपश्चिमको दार्चुला जिल्लामा तुइनबाट महाकाली नदी तर्ने क्रममा एक नेपाली युवा बेपत्ता भएको घटनाको सत्य तत्थ्य र वास्तविकता बाहिर ल्याउन कांग्रसले माग गरेको छ।
शुक्रबार दार्चुला जिल्लाको व्यास गाउँपालिकाबाट भारत उत्तराखण्ड राज्यको पांगल हुँदै खलङ्गा आउँदै गर्दा तुइनबाट महाकाली नदी तर्ने क्रममा ३५ वर्षीय जयसिंह धामी नदीमा खसेर बेपत्ता भएका थिए।
भारतीय एसएसबीका जवानले तुइन काटिदिएपछि उक्त घटना भएको प्रत्यक्षदर्शीले बताएका छन्। कांग्रेस प्रवक्ता विश्वप्रकाश शर्माका अनुसार समाचार सार्वजनिक भए पश्चात जिल्ला पार्टी सभापति ललितसिंह बोहरा र अन्य नेतृत्व तहले स्थानीय रूपमा गरेको थप सम्पर्क पश्चात सोही विवरण केन्द्रमा प्राप्त भएको जानकारी दिएका छन्।
शर्माद्वारा जारी विज्ञप्तिमा भनिएको छ, ‘नदी तर्ने क्रममा तुइन काटिदिएपछि ३५ वर्षीय युवा जयसिंह धामी नदीमा खसेर बेपत्ता भएको घटना अत्यन्तै दुःखद मात्रै होइन अमानवीय र अत्यन्तै आपत्तिजनक छ।’
‘घटनाको सम्पूर्ण वास्तविकता सार्वजनिक गर्न, भारतीय पक्षसँग यसबारेमा संवाद गर्न, आफ्नो नागरिकलाई न्याय दिलाउन, सम्बन्धित परिवारजनलाई राहत दिन दिलाउन नेपाली कांग्रेस पार्टीका तर्फबाट म सरकार समक्ष माग गर्दछु,’ शर्माले विज्ञप्तिमा भनेका छन्।’
त्यस्तै आफ्ना नागरिकको जीवन सुरक्षा गर्ने दायित्व बोकेको सरकारले यसलाई अत्यन्तै गम्भीरतापूर्वक लिएर आवश्यक पहलकदमी गर्न पनि सरकारलाई अनुरोध गरिएको छ।
