काठमाडौँ। प्रधानमन्त्री शेरबहादुर देउवाले नेपाली कांग्रेसका सांसद तथा नीजि विद्यालय सञ्चालक उमेश श्रेष्ठलाई स्वास्थ्य राज्यमन्त्री नियुक्त गरेका छन्।
प्रधानमन्त्री देउवाले स्वास्थ्य मन्त्रालयको जिम्मेवारी आफैंसँग राखेर आइतबार श्रेष्ठलाई राज्यमन्त्री नियुक्त गरेको राष्ट्रपति कार्यालयले जनाएको छ। कोरोना महामारीका बेला स्वास्थ्यमन्त्री नियुक्त नगरेको भन्दै प्रधानमन्त्री देउवालाई चौतर्फी दबाब थियो।
आफूलाई समर्थन गरेका दलहरूबीच मन्त्रालयको भागबन्डा टुंगिन बाँकी रहेकाले देउवाले कांग्रेस सांसद श्रेष्ठलाई राज्यमन्त्रीमात्र नियुक्त गरेको बुझिएको छ। राज्यमन्त्री नियुक्त भएका श्रेष्ठ भोजपुरका हुन्। उनी कांग्रेसका समानुपातिक सांसद हुन्।
उनी लिटिल एन्जल्स विद्यालयका सञ्चालक हुन्। श्रेष्ठको जग्गा, बैंक र होटल क्षेत्रमा पनि लगानी छ। उनी प्याब्सनको अध्यक्ष पनि थिए। श्रेष्ठलाई राज्यमन्त्री नियुक्त गरेसँगै प्रधानमन्त्री देउवाको चौतर्फि आलोचना सुरु भएको छ। श्रेष्ठलाई सांसद बनाउँदा पनि चर्चा भएको थियो। संसद्मा पुगेपछि उनी स्वार्थ बाझिने समितिमा बसेर शिक्षासम्बन्धी नीति र कानुन बनाउन पनि संलग्न भएका व्यक्ति हुन्।
भनिन्छ, उनको व्यवसाय शिक्षामा मात्र नभएर बैंकदेखि घरजग्गा व्यवसायसम्ममा हात हालेका छन्। पछिल्लो समय निजी अस्पतालमा लगानी गर्ने योजना अगाडि बढाएका थिए। देउवाले श्रेष्ठको योजनालाई बल पुग्नेगरी स्वास्थ्य तथा जनसंख्या मन्त्रालयको जिम्मेवारी स्वार्थ बाझिने व्यक्तिलाई सुम्पेका छन्।
