काठमाडौं। निवर्तमान प्रधानमन्त्री केपी शर्मा ओलीले आफू नेतृत्वको सरकार ऐतिहासिक रुपमा सफल भएको जिकिर गरेका छन्।
सिंहदरबार छाड्नुअघि राष्ट्रका नाममा सम्बोधन गर्ने क्रममा ओलीले आफ्नो सरकार ऐतिहासिक रुपमा सफल भएको जिकिर गरेका हुन्। सम्बोधनको अधिकाशं समय अदालत र विपक्षि गठबन्धनमाथि खनिएका ओलीले अन्ततः अदालतको निर्णय मान्ने पालना गर्ने बताएका छन्।
यसका लागि उनले सबै नेपालीहरु, कर्मचारी सुरक्षाकर्मी, राष्ट्रसेवक, कोभिडविरुद्ध अग्रमोर्चामा खटिएकाहरु सबैलाई धन्यवाद दिएका छन्। त्यस्तै नेपालको विकास साझेदार मित्रराष्ट्रका सरकार प्रमुख र राष्ट्रप्रमुखलाई पनि ओलीले धन्यवाद दिएका छन्।
प्रधानमन्त्री ओलीले एकछिन बादल लागेको भन्दै फेरि बादल हटाएर सूर्य आउने दावी गरे। प्रधानमन्त्री ओलीले पार्टी कार्यकर्तालाई धैर्यता नगुमाउन र संयमता अपनाउन आग्रह गरेका छन्।
