धरहराको उद्घाटन आज



काठमाडौँ। २०७२ को भूकम्पले भत्किएपछि पुनर्निर्माण गरिएको २२ तले धरहरा शनिबार प्रधानमन्त्री केपी शर्मा ओलीले उदघाटन गर्दैछन्।

प्रधानमन्त्री ओलीले शनिबार बिहिन ११ बजे धरहरा उदघाटन गर्ने कार्यक्रम छ। उदघाटन कार्यक्रममा सीमित व्यक्तिहरुलाई मात्रै बोलाइएको छ। कोरोना संक्रमणको जोखिमका कारण उद्घाटन समारोहमा सिमित ब्यक्तिलाई मात्रै बोलाइएको राष्ट्रिय पुनर्निर्माण प्राधिकरणले जनाएको छ।

उदघाटन कार्यक्रम अवलोकनका लागि वैकल्पिक व्यवस्था गरिएको प्राधिकरणले जनाएको छ। धरहरा उदघाटन गरिए पनि अवलोकन गर्न भने पाइने छैन। धरहरा पूर्णरुपमा तयार भइसकेको छैन।

२०७२ सालको भूकम्पले नौ तले धराहरा भत्किएको थियो। राष्ट्रिय पुनर्निर्माण प्राधिकरणले पहिले धरहरा रहेकै स्थानमा २२ तले धरहरा पुनर्निर्माण गरेको छ। बाहिरबाट भने धरहरा ११ तलाको देखिन्छ। पुनर्निर्मित धरहरामा सुनको जलप लगाइएको गजुर बुधबार राखिएको थियो। २२औं तलामा शिवलिंग छ।

दुईवटा लिफ्ट र रंगरोगनको काम सकिएको छ। हाललाई एउटा मात्र लिफ्ट सन्चालन गरिएको छ। पार्किङ क्षेत्र, बगैंचालगायतको काम जारी छ। धरहरालाई बलियो, आकर्षक र अपांगमैत्री बनाइएको राष्ट्रिय पुनर्निर्माण प्राधिकरणका इञ्जिनियर राजुमान मानन्धरले बताए।

वरपरको २९ रोपनीमा विस्तारित रुपमा सुन्धारालाई समेटेर पार्क बनाउने सरकारी योजना अनुसार ३ अर्ब ८ करोड लागतमा रमण कन्स्ट्रक्सनले ठेक्का पाएको छ।