ओलीका विरुद्ध घनश्यामले आगो ओकले



काठमाडौँ। नेपाल कम्युनिस्ट पाटीका (नेकपा) प्रचण्ड–माधव समूहका नेता घनश्याम भुसालले प्रधानमन्त्री केपी शर्मा ओली पराजित हुनुको विकल्प नभएको बताएका छन्।

शुक्रबार काठमाडौँमा आयोजित जनसभालाई सम्बोधन गर्दै भुसालले ओलीले संविधानलाई च्यातच्युत पारेर ताण्डव नृत्य देखाएको आरोप लगाएका छन्। कसैलाई ओलीले चुनाव गराउँछन् भन्ने लागेको भए त्यो भ्रम मात्र भएको उनले बताए। सर्वोच्च अदालतमा दिएको जवाफमा ओलीले ७ ठाउँमा दुई तिहाई चाहिएकाले संसद भंग गरेको भन्दै उनले अघि भने,‘आफूले दुई तिहाइ ल्याउने सुनिश्चित नहुँदासम्म केपी ओलीले चुनाव गराउँदैनन्।’

त्योभन्दा पनि ठूलो ओलीले संविधानलाई च्यातच्युत पार्ने प्रयास गरेकाले उनलाई पराजित गर्नैपर्ने भएको उनले बताए। प्रधानमन्त्री ओलीलाई अझै पनि आफूले जित्छु भन्ने लागेको भन्दै नेता भुसालले अघि भने, ओलीसँग अब दुई वटा शक्ति मात्र छ। एउटा साइबर सेना भनिने साइबर स्याल छन्।’

अर्को शक्ति ओली र उनका नेताहरुले भन्ने गरेको सेटिङ भएको भन्दै उनले त्यो जसुसी उपान्यासमा मात्र हुने बताए। ओलीलाई घुँडा टेकाएर मात्र विश्राम लिने भन्दै उनले अघि भने, ‘यो अदालत तपाईंको सेटिङका कारण डराएर तपाईंको पक्षमा फैसला गर्छ भन्ने लागेको छ भने तपाई गलत हुनुहुन्छ।’

उनले नेपाली कम्युनिस्टका सामुन्नेमा तीनवटा कुराहरु देखा परेको बताए। उनले भने, ‘पहिलो कम्युनिस्ट आन्दोलन सकिने, दोस्रो लोकतन्त्र सकिने र तेस्रो केपी ओलीको अन्त्य। आज सबैले संविधान विघटन गतल छ भन्दा पनि उनी सेटिङमा मुद्धा जित्ने अपेक्षा गरिरहेका छन्। २१औं शताब्धिको अदालतले संविधान पढेको छैन?’