सुर्खेत। नेकपा विभाजनसँगै प्रदेश सरकारहरुमा भूकम्प जाने देखिएको छ।
यसै क्रममा कर्णाली प्रदेश सरकार धरमराउने देखिएको छ। कर्णाली प्रदेश सभाका पूर्वमाओवादी खेमाका दुईजना सांसद धर्मराज रेग्मी र ठम्बर विष्ट ओली समूहको केन्द्रीय सदस्यमा मनोनित भएपछि प्रदेश सरकार अस्थिर बन्ने देखिएको छ। ४० सदस्यीय प्रदेश सभामा नेकपाका ३३ जना, नेपाली कांग्रेसका ६ र राप्रपाका एकजना सांसद छन्।
गत असोज २५ गते मुख्यमन्त्री महेन्द्रबहादुर शाहीविरुद्ध अविश्वासको प्रस्तावमा हस्तार गर्ने १८ जना सांसदमध्ये रेग्मी र विष्टको पनि नाम थियो। तर, सांसद विष्टले अन्तिम समयमा अविश्वासको प्रस्तावबाट आफ्नो नाम फिर्ता लिएका थिए।
नेकपाका ३३ मध्ये अब ओली समूहमा सभामुखसहित १४ जना, प्रचण्ड-नेपालका १९ जना सांसदहरु रहेका छन्। प्रदेश सरकार गठन गर्नका लागि २१ जना सांसदको आवश्यकता पर्छ। यसका लागि दुवै पक्षले कांग्रेस र राप्रपासाग सहकार्य गर्नु पर्ने हुन्छ।
