काठमाडौँ। मोरङमा शिक्षकको अपहरणपछि गोली हानी हत्या भएको छ।
प्रहरी उपरीक्षक सन्तोष खड्काका अनुसार मिक्लाजुङ गाउँपालिका १ बर्खेका ५४ वर्षीय शिक्षक राजेन्द्र श्रेष्ठको मंगलबार बिहान गोली हानी अज्ञात समूहले हत्या गरेका हाे।
खड्काका अनुसार मंगलबार घरबाटै उठाएर बर्खे जंगलमा लगेर हत्या गरिएको हो। मगलबार बिहान सवा ६ बजेतिर चार पाँच जनाको संख्यामा आएको अज्ञात समूहले शिक्षकलाई घरबाट उठाएर जंगलतर्फ लगेका थिए। खड्काले भने, ‘घरदेखि करिब ३० मिनेट टाढा जंगलमा लगेर हत्या भएको छ।’
प्रहरीले हत्या गर्नेहरूको खोजी गरिरहेको खड्काले बताए। श्रेष्ठ स्थानीय सरस्वती आधारभूत स्कुलका प्रधानाध्यापक थिए। शिक्षक श्रेष्ठको टाउकोमा गोली लागेको खड्काले बताए।
