काठमाडौँ। भारतीय प्रधानमन्त्री नरेन्द्र मोदी, राष्ट्रपति रामनाथ कोविन्द र अन्य भिभिआइपीका लागि विशेष अर्डरमा अमेरिकामा दुई एयर इन्डिया वन (बोइंग ७७७) विमान तयार गरिएको छ।
यी दुबै विमानमध्ये एउटा बिहिबार दिल्लीको इन्दिरा गान्धी अन्तर्राष्ट्रिय एयरपोर्ट पुग्यो। यो खबरलाई नवभारत टाइम्सले आफ्नो पहिलो पानामा प्रकाशित गरेको छ।
पत्रिकाका अनुसार यो विमान एयर इन्डियाको कमर्शियल क्षेत्र अन्तर्गतको हो र यसलाई अमेरिकाको राष्ट्रपतिको विशेष विमान एयरफोर्स वन जस्तै मिसाइल हमलाबाट बचाउनेजस्ता सुरक्षाका विशेषताले सुसज्जित गर्नका लागि बोइंगमा पठाइएको थियो ।
पत्रिकाका अनुसार यी दुबै विमानलाई अपग्रेड गर्नका लागि ८,४०० करोड खर्च आएको छ । यी दुबै विमान मिसाइल डिफेन्स सिस्टमबाट सुसज्जित छ । यो प्रविधिलाई अमेरिकाबाट १,३८९ करोडमा खरिद गरिएको छ ।
पत्रिकाले स्रोतलाई उद्धृत गर्दै जसबसम्म एयर फोर्सका पाइलटलाई यो चलाउन पूर्ण तालिम दिइँदैन तबसम्म एयर इन्डियाका पाइलटले नै यसको सञ्चालन गर्ने जानकारी दिएको छ ।
यो विमानले मोदीको यात्रामा प्रयोग हुने वी–७४७ को स्थान ओगट्नेछ । यो विमानमा विभिन्न प्रकारका विशेष सुविधा दिइएको छ । यसमा एउटा विशेष सिक्योरिटी सुइट छ जसका कारण भिआईपीको सुरक्षामा कुनै खतरा हुनसक्दैन । यसमा भिडियो र अडियो संवादको सुविधा पनि छ । यो विमानभित्र एउटा सानो मेडिकल सेन्टर पनि बनाइएको छ ।
