नेपालमा भाइबरको नयाँ युजर इन्टरफेस


काठमाडौँ। सञ्चार आदान प्रदानका लागि विश्वका ठूला एपहरुमध्येको एक राकुटेन भाइबरले नेपालमा आफ्ना प्रयोगकर्ताका लागि नयाँ युजर इन्टरफेसको सुरुवात गरेको छ।

नयाँ योजनाअनुसार प्रयोगकर्तालाई एपमार्फत् नेभिगेट गर्न र आफूलाई मनपर्ने व्यक्तिसँग सहज रुपमा कुराकानी गर्न अनुमति प्रदान गर्ने कम्पनीले जनाएको छ।

यो नयाँ युजर इन्टरफेसका साथमा भाइबर प्रयोगकर्ताहरुले अब आफ्ना परिवार, साथीभाइ, र सहपाठीसँग म्यासेजिङ एपलाई नेपाली भाषामा परिवर्तन गरी संलग्न हुन सक्ने भन्दै कम्पनीले यो कार्यलाई एपको ‘सेटिङ्ग’ मा गएर र उनीहरुका पूर्व निर्धारित भाषा चयन गरेर पूरा गर्न सक्ने जनाएको छ।

विश्वव्यापी रुपमा कोभिड–१९ को फैलावटलाई रोक्न र नागरिकको स्वास्थ्य र सुरक्षालाई अझ सुनिश्चित् गर्न विश्वका सबै मुलुकहरुले सामाजिक दूरीको कडाईपूर्वक पालना गरिरहेको सन्दर्भमा भाइबर एपको प्रयोग उल्लेखनीय रुपमा वृद्धि भएर एक रेकर्ड नै कायम भएकोे कम्पनीको दावी छ।

गएको २ सातामा सामूहिक सन्देश १३४ प्रतिशतभन्दा धेरै र सरदर भाइबर प्रयोगकर्ताले प्राप्त गर्ने सामूहिक कलको संख्या ३७० प्रतिशतले बढेको छ भने समुदाय संलग्नताको सरदर संख्या७८ प्रतिशतले वृद्धि भएको छ। यो नयाँ तथा स्थानीयकृत युआइको सुरुवातसँगै भाइबरले नेपाली प्रयोगकर्ताहरुबीच इन–एप क्रियाकलापमा अझ धेरै उल्लेख्य वृद्धि हुने अपेक्षा गरेको जनाएको छ।