१४औं महाधिवेशन फागुनमै गर्ने कांग्रेसको निर्णय


काठमाडौँ। नेपाली कांग्रेसका केन्द्रीय कार्यसमितिको बैठकले फागुनको पहिलो साता १४औं महाधिवेशन निर्णय गरेको छ।

सोमबार सानेपा स्थित पार्टीको केन्द्रीय कार्यालयमा बसेको केन्द्रीय समितिको बैठकले आसन्न १४औं महाधिवेशनको कार्यतालिका परिमार्जन गर्दै फागुनको पहिलो सातामै महाधिवेशन सम्पन्न गर्ने निर्णय गरेको छ। महाधिवेशनको कार्यक्रम असार २५ गतेबाट सुरु गर्ने र केन्द्रीय महाधिवेशन यसअघि तोकिएकै मितिमा गर्ने बैठकले निर्णय लिएको हो।

असार १६ गतेदेखि जारी केन्द्रीय कार्यसमिति बैठकले सोमबार उक्त निर्णय लिएको हो। बैठकमा महामन्त्री पूर्णबहादुर खड्काले पदाधिकारी बैठकमा परिमार्जित तालिका प्रस्तुत गरेका थिए। पदाधिकारी बैठकले पारित गरेर अनुमोदनका लागि केन्द्रीय समितिलाई जिम्मेवारी दिएको थियो।

सोही प्रस्ताव १६ गतेको केन्द्रीय समिति बैठकमा महामन्त्री खड्काले प्रस्तुत गरेका थिए। बैठकले समायोजनको काम साउन १० गते भित्र सक्ने निर्णय गरेको छ। प्रस्तुत कार्यातालिकामा असार मसान्तभित्र पार्टी संमायोजन सक्ने भनिएको थियो।

त्यसमा केही संशोधन गरी साउन १० गतेसम्म सक्ने बैठकले निर्णय लिएको छ। अन्य कार्यतालिका भने बैठकले जस्ताको त्यस्तै अनुमोदन गरेको हो। क्रियाशील सदस्यताको वितरण, नवीकरण साउन मसान्तभित्र सक्ने र भदौ मसान्तभित्र सदस्यताको सूची केन्द्रमा पठाई सक्न मातहतका स्थानीय निकायलाई निर्देशन गरेको छ।

जसअनुसार भदौ मसान्तभित्र क्रियाशील सदस्यताको सूची केन्द्रमा पठाउने, असोज मसान्तभित्र क्रियाशील सदस्यतामाथि उजुरी र कात्तिक मसान्तभित्र क्रियाशील सदस्यतामाथि पुनरावेदन दिने छ। यस्तै मङ्सिर २५ भित्र क्रियाशील सदस्यताको विवाद टुङ्ग्याउने र मङ्सिर मसान्तभित्र क्रियाशील सदस्यताको सूची निर्वाचन समितिलाई बुझाउने छ।

७७ पुस ६ मा वडा अधिवेशन, पुस ८ मा गाउँ र नगरपालिका अधिवेशन, पुस ११ मा प्रदेश सभा क्षेत्रीय अधिवेशन, पुस १३ मा ‘प्रतिनिधि सभा क्षेत्रीय अधिवेशन’ एक मात्रै प्रतिनिधि सभा निर्वाचन क्षेत्र रहेकामा जिल्ला अधिवेशनको मिति तोकिएको छ।

यस्तै एकभन्दा बढी प्रतिनिधि सभा निर्वाचन क्षेत्र रहेका जिल्लाको अधिवेशन पुस १६ गते र प्रदेश अधिवेशन माघ ६ गते गर्ने छ। फागुन ७, ८,९ र १० का लागि पूर्व निधारित महाधिवेशनको मिति भने यथावत राखिएको छ।

बैठकमा बरिष्ठ नेता रामचन्द्र पौडेल, गगन थापा, डिला संग्रौलालगायतले फागुनमा महाधिवेशन सक्ने लक्ष्यका साथ काम पनि हुनुपर्नेमा जोड दिएका थिए। यस्तै नेताहरुले सत्तारुढ दल नेपाल कम्युनिस्ट पार्टी नेकपाको आन्तरिक विवादमा काँग्रेस निरपेक्ष रहनुपर्ने बताएका थिए। यस्तै बैठकले सरकारले अकास्मिक संसद अधिवेशन अन्त्य गरेकोप्रति विमती जनाएको छ।