काठमाडौँ। बंगलादेशबाट जेठ ३२ गते दुई सय ६५ जना नेपाली स्वदेश फर्किने भएका छन्।
सोमबार पहिलो उडानमा नेपाल आउने यात्रुको नामवाली तय भएको छ। जसमा अधिकांश चिकित्सा शिक्षा अध्ययनरत विद्यार्थी र नेपाली सेना रहेका छन्।
ती विद्यार्थीहरुले नेपालमा लकडाउन भएको समय देखि नै उद्दारको अपिल गरेका थिए। कर्णाली सन्देश मार्फत निरन्तर उनीहरूका माग र क्रियाकलाप प्रकाशित गर्दै आएको थियो।
विद्यार्थी हकहित र अधिकारको बारेमा काम गर्दै आएका सामाजिक अभियन्ता नवीन यादवको सक्रियतामा स्वदेश फिर्तीको मागसङ्ग बिद्यार्थीहरु डिजिटल रिले अनशनसमेत बसेका थिए।
ढाकास्थित नेपाली दूतावासका अनुसार पहिलो उडानको लागि छनोट गरिएको नेपालीलाई कोभिड-१९को स्वास्थ्य परीक्षण गर्न सूचना जारी भएको छ।
नेपाल आउनको लागि १९ हजार ९ सय ५८ रुपैयाँ तोकिएको छ। यात्रुले नेपालमै टिकट खरिद गर्नु पर्नेछ।
बंगलादेशबाट नेपाल फिर्नको लागि ८६० जनाले आवेदन दिएका छन्।
दूतावासले दोस्रो उडानको लागि पनि सूची बनाइसकेको जनाएको छ।
