कपिल अन्जान,
कोहलपुर। कोहलपुर नगरपालिका वडा नं.२ मा बस्दै आएकी गोपी विकले छोरा छत्र विकको उपचार सफल भएपनि अस्पताललाई तिर्ने पैसाको अभावका कारण डिस्चार्ज गरेर घर लैजान नपाएको बताएकी छिन्।
सल्यानको सुइकोट माइतमा गएको बेला वैशाख ३ गते खेल्ने क्रममा रुखबाट लडेर छोराको दायाँ खुट्टा भाचिएको उनले बताइन्। अहिले खुट्टाको उपचार सफल भएपनि उपचार खर्च जुटाउन नसक्दा नेपालगंज मेडिकल कलेज शिक्षण अस्पताल कोहलपुरबाट डिस्चार्ज गरेर घर लैजान समस्या परेको र अस्पताल प्रशासनबाट केहि रकम छुट भएपनि अरु पैसा जुटाउन नसकेको बताइन्।
अनुहार निन्याउरो बनाउँदै भनिन्, ‘श्रीमान् छैनन, पैसा छैन, छोरो बाँचोस् भनेर अस्पताल ल्याए तर उपचार खर्चको जुटाउन कहाँ जाउँ, के गरुँ । एकातिर घरमा खाने अनाज छैन, अर्कोतिर लकडाउनले गर्दा कतै काम गर्न जानै पाइदैन, त्यसमा पनि छोरोको खुट्टाको उपचारले झन पीडा माथि पीडा थपिदियो।’
मृगौलाले काम गर्न छोडेपछि श्रीमान् को २ वर्षअघि मृत्यु भएको र आफ्नो अवस्था एकदमै नाजुक भएकाले सबैलाई सहयोगका लागि अनुरोध गरेकी छिन्। कसैले सामाजिक संजालमा छत्र विकको अवस्थाको बारे जानकारी गराए लगत्तै उनको अवस्था बुझ्न अस्पताल गएको र आफूहरुले सक्दो सहयोग गर्ने मानवअधिकारका लागि महिला, एकल महिला समूहका केन्द्रीय उपाध्यक्ष शोभा बि.सी.ले बताइन्। उनले आफूहरुले व्यक्तितग रुपमा उठाएको ५ हजार र कोहलपुर नगरपालिकाबाट प्राप्त भएको ५ हजार आज अस्पतालमा गएर आमा गोपि वि.क.लाई हस्तारण गरेको बताइन्।
द्वन्द्वपीडित एकल महिला संजाल बाँकेका अध्यक्ष जयन्ती केसीले गोपि विक एकल भएकै कारणले कमजोर भएको महशुस हुन नदिन आफूहरुले सबै दिदीबहिनीहरुलाई सहयोग गर्न अनुरोध गरेकी छिन्।
उनले केन्द्रीय उपाध्यक्षसहित बाँके जिल्लाका कार्यसमिति सदस्यहरु अस्पतालमा गएर उनको छोराको उपचार खर्च जुटाउन आफूहरु लाग्ने वचन दिएको पनि बताइन्। साथै उनले सबैलाई यस्तो आपत विपतको बेला सहयोग गर्न आग्रह पनि गरेकी छिन्।
सहयोगका लागि–९४०३०२५३, ९५०७०७२६
