कालिकोट। विश्व माहामारीका रुपमा फैलिरहेको कोरानाभाइरस (कोभिड १९) बाट बच्न जिल्लाको नरहरिनाथ गाउँपालिकाले विभिन्न ठाउँमा हेल्थ डेस्क स्थापना गर्ने भएको छ।
संघीय सरकारले बिहीबार कोरोनाबाट बच्न र संक्रमण हुन नदिनको लागि सम्पूर्ण तयारीमा जुट्न निर्देशन दिएसँगै गापाले पनि आवश्यक तयारी थालेको हो।
गाउँपालिकाका प्रत्येक वडाहरुमा कोरोना सम्बन्धी जानकारीमुलक र जनचेतनामुलक पोष्टरहरुसमेत वितरण गरिने अध्यक्ष धीरबहादुर बिष्टले बताएका छन्। अध्यक्ष बिष्टले कोरोना विश्वभरी माहामारीको रुप लिएका कारण आफू र अरुलाई बचाउन सम्पूर्णमा अनुरोध समेत गरेका छन्।
अध्यक्ष बिष्टको संयोजकत्वमा गाउँपालिका स्तरीय कोरोनाभाईरस पूर्व नियन्त्रण समिति गठन गरिएको छ। समितिमा गाउँपालिकाका उपाध्यक्ष, ९ वटै वडाका अध्यक्षहरु विभिन्न राजनीतिक दलका प्रतिनीधीहरु र स्वास्थ्यकर्मीलगायत १६ सदस्य कोरोनाभाईरस पूर्व नियन्त्रण समितिमा रहेका छन्।
साथै लंकबहादुर बटालाको संयोजकत्वमा ६ सदस्यीय प्राविधिक तयारी समिति समेत गठन गरिएको छ। त्यस्तै कोरोना भित्रिन र संक्रमित हुन नदिनका लागि प्राथमिक स्वास्थ्य केन्द्र कुमालगाउँमा २ बेडको आईसुलेसन स्थापना गरिने भएको छ।
गाउँपालिकाका मुख्य नाका तथा प्रवेशद्वारहरु वडा नं १ को कोटबाडाको पानी ट्यांकी, वडा नं ८ को खुलालु चौकी र अछामसँग सिमाना जोडिएका उच्छव र लालुको बार्सेलगायतका प्रमुख नाकाहरुमा हेल्थ डेस्क स्थापना र आवश्यकीय औषधी उपकरणहरुकोसमेत प्रवन्ध मिलाईने गाउँपालिकाले बताएको छ।
