काठमाडौं। सरकारले कुनै पनि राजनीतिक गतिविधि गर्न नपाउने गरी प्रतिबन्ध लगाएको नेत्रविक्रम चन्द ‘विप्लव’ नेतृत्वको दल नेपाल कम्युनिस्ट पार्टी सीमा अतिक्रमणको विरोधमा सडकमा उत्रिएको छ।
भारतले जारी गरेको नयाँ नक्साबारे चौतर्फी आलोचना भइरहँदा विप्लव समूहका नेता कार्यकर्तासमेत सीमा अतिक्रमणविरुद्ध सडक प्रदर्शनमा उत्रिएका हुन्। प्रदर्शनमा उत्रिएका सो समूहका नेता कार्यकर्तालाई प्रहरीले धमाधम पक्राउसमेत गर्न थालेको छ।
आइतबार माइतीघर मण्डलामा भएको प्रदर्शनमा सहभागी विद्यार्थीसहित नेता कार्यकता गरी प्रहरीले २० जनालाई पक्राउ गरेको थियो। पक्राउ परेकामध्ये एक जना भने गत जेठमा भएको बसुन्धारा विस्फोट प्रकरणका फरार प्रतिवादी रहेको महानगरीय प्रहरी परिसर काठमाडौंले जनाएको छ।
परिसरका प्रमुख एसएसपी उत्तमराज सुवेदीका अनुसार अछामको पञ्चदेवल गाउँपालिका–२ का छत्र कार्की बसुन्धारा विस्फोट प्रकरणका फरार प्रतिवादी हुन्। १३ जेठमा आह्वान गरिएको नेपाल बन्दको पूर्वसन्ध्यामा अनामनगर र बसुन्धारामा भएको ‘आत्मघाती’ विस्फोटमा परेर चार जना विप्लव समूहका कार्यकर्ताको ज्यान गएको थियो।
यसैगरी, सोमबार समेत प्रदर्शनको तयारीमा रहेका सात जना नेता कार्यकर्तालाई प्रहरीले पक्राउ गरेको छ। राजधानीको घण्टाघर हुँदै लैनचौरस्थित भारतीय दूतावासमा ज्ञापनपत्र बुझाउन जाने तयारीमा रहेका उनीहरूलाई प्रहरीले निस्कनुअघि नै पक्राउ गरेको हो।
पक्राउ पर्नेहरूमा तमु राष्ट्रिय मुक्ति मोर्चाका केन्द्रीय अध्यक्ष मकर गुरुङ, जनस्वास्थ्यकर्मी संघका केन्द्रीय अध्यक्ष टीका कँडेल र प्राध्यापक संघका केन्द्रीय अध्यक्ष मोहन खतिवडा, कुमार घिसिङ, करण श्रेष्ठ, महेश तामाङ र विषम छन्।
नेपाली भूमिलाई आफ्नो नक्सामा समावेश गरेको विरोधमा सो समूहले सोमबार देशैभर प्रदर्शन गर्ने गरी संघर्षका कार्यक्रम सार्वजनिक गरेको थियो। सो पार्टीका महासचिव विप्लवले २० कात्तिकमा प्रेस विज्ञप्ति जारी गर्दै भारतले गरेको नेपालमाथिको हस्तक्षेपको विरोध गर्ने बताएका थिए। यो समाचार राजधानी दैनिकले प्रकाशित गरेको छ।
