१७औं अनसन बस्न डा.केसी डडेलधुरामा, यस्ता छन् ६ बुँदे माग


काठमाडौँ । सामाजिक अभियन्ता एवं प्रा.डा. गोविन्द केसी आफ्नो १७औं अनशनका लागि डडेलधुरा पुगेका छन्। सरकारले आफूसँग गरेको सहमति कार्यन्वयन नगरेको भन्दै डा.केसी १७औं पटक अनशन बस्न त्यसतर्फ लागेका हुन्।

डा.केसीले आफ्नो १७औं अनसनका लागि केही दिन अघिदेखि काठमाडौंमा अनसन स्थलको खोजिमासमेत जुटेको खबर बाहिरिएका थिए। राजधानीमा उचित स्थान नपाएपछि डा.केसी डडेलधुरा पुगेका हुन्।

चिकित्सा शिक्षाका सुधारका लागि डा.केसीले टिचिङ अस्पतालमै २०६९ साल असार २१ गते पहिलो अनशन शुरू गरेका थिए। गत असोज २७ गते उमेर हदका कारण टिचिङबाट अवकाश पाएपछि उनी अहिले अनशन स्थानको खोजिमा लागेका थिए।

डा.केसीले आफ्नो १७औं अनसनको माग भने असोज २७ गतेको पत्रकार सम्मेलनमा सार्वजनिक गरेका थिए। उनले यसअघि आफ्ना माग पूरा गर्न सरकारलाई कात्तिक ८ गतेसम्मको अल्टिमेटम दिएका थिए।

डा.केसीका माग

१ हामीसँग  २०७५ साउन  १० गते भएको सम्झौताअनुसार चिकित्सा शिक्षा ऐनमा संशोधन गरियोस।

२  विश्वबिद्यालयहरुमा पदाधिकारी नियुक्तिको हालको प्रक्रिया रोकी पराशर कोइराला नेतृत्वको मापदण्ड निर्धारण समितिले दिएको सुझाब अनुरूप निष्पक्ष र पारदर्शिता ढङ्गले पदाधिकारी नियुक्त गर्ने कानूनी व्यवस्था गरियोस।

३  आंदोलनरत मेडिकल विद्यार्थीहरुका मागहरु पूरा गर्दै नेपालका सबै निजी मेडिकल कलेजले अवैध रुपमा असूल गरेको सम्पूर्ण  रकम फिर्ता गरियोस।  अरबौंको ठगी तथा आर्थिक अपराधका दोषी मेडिकल कलेजका संचालकहरुलाई फौजदारी कानुनबमोजिम कडाभन्दा कडा कारबाही गरियोस।

 ४  संसदीय उपसमितिको माफियाको प्रभावमा गरिएको शुल्क र सीट संख्यामा वृद्वि गर्नेसम्बन्धी लगायतको निर्णय  तत्काल खारेज गरियोस।

 ५  कर्णाली स्वास्थ्य विज्ञान प्रतिष्ठानमा तत्काल पूर्वाधार र जनशक्ति पुर्याएर एमबिबिएस कार्यक्रम संचालन गरियोस। कर्णाली स्वास्थ्य विज्ञान प्रतिष्ठानमा एमडिजिपी कार्यक्रम संचालन गर्ने अनुमति अनुचित ढङ्गले प्रधानमंत्री कार्यालयले अडकाएर राखेकाले  त्यसलाई तुरुन्त स्विकृति दिँदै शीघ्र  एमबिबिएस कार्यक्रम संचालन गर्ने व्यवस्था गरियोस। प्रदेश नं दुई र चार तथा डोटी र डडेल्धुरा, उदयपुर र इलाम र पाँचथरमा सरकारी मेडिकल कलेज खोल्ने प्रक्रिया अघि बढाइयोस।

 ६ संक्रमणकालीन न्यायसम्बन्धी आयोगहरुमा दलीय भागवंडाबाट नभई पीडितको विश्वास जित्ने विज्ञहरुलाई नियुक्त गरियोस्।